Тэнгэр заяат Монгол бүсгүй

Шинэхэн долоо хоногийн мэндийг бүгдэд хүргэе!!! Эхлэн буй шинэхэн долоо хоногтоо эвээр жаргал, инээмсэглэлээр гоёл хийгээд шижигнүүлж амьдарна шүү бүгдээрээ.

Эрэн сурвалжлагдаж, эрж хайгдах хүртэл ээ сураг алдарсан би бээр өнгөрсөн өдрүүдийг үүрээс эхлээд үдшийн бүрий болтол асар завгүй өнгөрүүлж блогдох битгий хэл бондгорхон дүү нартаа бараа зүсээ ч харуулах завгүй гадуур шогшин өнгөрүүллээ. Ар араасаа ундарсан завгүй их ажлууд аз жаргалтай төгсгөлөөр төгссөн, гэхдээ энэ аз жаргалд миний оруулсан хувь нэмэр туйлаас бага.

Ямартай ч завгүй өнгөрсөн тэр өдрүүдэд олон олон бодол хөвөрч, олон олон ухаан нэмсээн. Шударга шулуухан үгтэй хөөрхөн эгч минь миний амьдралыг зад шүүмжилж, хүний амьдарвал зохих ёстой шугамны альхан хэсэгт явааг минь тод томруунаар ойлгуулсан. Болоод л байна гэж бодсон бодол минь яльгүй эндүүрэл байсныг тэгэхэд л мэдлээ. Гэхдээ болно гэсэн итгэл хангалттай надад үрслэгдсэн, баяртай байна аа.

Энэ хорвоог сайн хүмүүсээр дүүрэн гэдгийг би мэддэг гэхдээ сайн хүмүүс миний боддогоос ч илүү их байдаг байх юм. Эргэн тойрон хүрээлэх бүхэн, үгээрээ үйлдлээрээ намайг хайрлаж, хүндэтгэж байхад чухам яаж би аз жаргалгүй амьдрах билээ, аз жаргал гэдэг надаас эхэлж бусдад хүрч, бусдаас дамжин надад ирж байх гинжин хэлхээ, энэ гинжин хэлхээг таслахгүй байх үүргийг  уншигч та ч бас хүлээх ёстой юм шүү.

Амс хийх завдал өгөхгүй цуварсан их ажил, аз жаргалыг харамгүй надад бэлэглэж чимэх чимэхээр гундаж байсан сэтгэлийг минь дахин төрсөн мэт шинэхэн саруулхан болгосон, яг л нар шиг дулаахан бас халуухан. Ийм сэтгэлтэй болсон би хүсэж байснаараа шижигнүүлж амьдрахаар сэргэлэн цовоо сууна. Нэг л тийм сайхан, нэг л тийм гоё юмаа " Амьдрал  бас Хүн та "