Тэнгэр заяат Монгол бүсгүй

Сайн байна уу? Хайрт ах минь

Олон хоног таны тухай бодол сэтгэлд минь хөвөрлөө, хөврөх тэр бодлуудыг цэгцлэн байж тандаа захидал болгон илгээе гэж хүслээ. Хэнхэг нь дэндсэн дүүгийнхээ илүү үглэлтээс хэрэгтэйг нь аваад хэрэггүйг нь гээгээрэй ах минь.

Нас чинь хэдийн гуч хүрсэн ч найзлах охидоос онцолж гэртээ дагуулан ирж байсан удаагүй болохоор таныгаа би хүндэтгэж өнөөдрийн шийдвэрт чинь баярлан таныхаа талд бат зогсоё. Гэхдээ ах минь та нэг өдөр зугаацах бус нэг насаараа хамт амьдрах амьдралын ханиа сонгож байгаа хүн, олон талаас нь эргэцүүлж зөв л шийдвэр гаргах ёстой тиймээс та минь сайн бод. Нэгийг бус хоёрыг сонгож байгаагийн учир бодол бодлын дээд болгон сайтар бод ах минь.  Өнөөдөр сонгож, маргааш эхлүүлэх амьдрал чинь аавын гэрт дураар амьдрахаас эс өөр, танаас минь үүрэг хариуцлага, ухаан тэвчээр, хайр халамж аль алийг нь шаардана. Асуудал бүхнийг нуруундаа үүрч, сэтгэлдээ тэднийг л тээж, хайр халамжаа бүрэн зориулахдаа та минь үнэхээр бэлэн үү??? Нэг бус хоёр хувь заяаг сонгож байгаа болохоор чинь хөнгөн хуумгай хандах вий гэхдээ дэмий үглэж суугаа минь энэ.

Танаас л хамаарч хоёрын хоёр хувь заяа аль нэг тийш эргэхийг санаж зөв л шийдвэр гаргаарай. Эхлээд л та амьдралаа зөв эхлүүлбэл энэ бие элэгдтэл эвтэй сайхан амьдарна. Эд гэдэг эвийг даган өсөж, өнгөө олон гялалздаг гэдэг тиймээс эдээс илүүтэй эвийг эрхэмлэн амьдрах нь зүйтэй мэт. Ингэж хэлэхийн учир нь та минь баахан дураараа бас чамгүй зөрүүд зантай нэгэн. Амьдралд гарах аар саархан асуудалд бухимдахдаа аавын гэрт дураар эрхлэн, аашаа даган зөрүүдэлж, болохгүй дээ хүрвэл уураар айлгаж хаалга саван гарч явдаг шиг ээ амьдарвал хүсэн байж тэднийг авах хэрэг юу. Ааштайгаа ханьсан, арга эвийг нь хайраараа олчихдог аав ээжтэйгээ насыг барсан нь дээр биз. Үнэндээ ах минь танаас илүүтэй тэднийг бодохдоо зөв л шийдвэр гаргаасай гэж би хүснэ.

Үрээ дагуулсан бүсгүй энэ хорвоод олон. Бидний эгч ч бас нэгэн цагт тийм л явсан. Үрд нь эцэг болох, өөрт нь хань байж чадах тийм л нэгнийг эгч минь битүүхэн харуулдаж үеийн залуусыг нууцxан шинжиж суусан. Тэр цагт эгчдээ жаргал хүсэж түүнээс ч илүүтэй дагуулан ирэх залууг бид шинжиж, дэндүү их итгэл, дэндүү их сэтгэлээ өгсөн. Яг л түүн шиг тэр айлын хүн бүр танд минь итгэж найдаж суугаа. Аав ээжийн сэтгэл эгчийн төлөө шаналан, нойр дутуу хонодог байсан шиг тэр нэгэн аав, тэр нэгэн ээж хоёрын хоёр охиндоо сэтгэл нь зовинож, нойроо хулжааж байгаа. Олон хүний сэтгэлд итгэл бадамлуулан тэр айлын хаалгаар орох гэж буйгаа та минь ойлгож байна уу? Аав ээжид нь таалагддаг гэж битгий биеэ өмөөрөөрэй, аав ээжтэй нь бус аальхан тэр бүсгүйтэй л амьдрах хүн шүү та.

Өөдөсxөн жаахан охин танаар л эр хүн тэр тусмаа эцэг хүнийг төсөөлөн өсөх гэж байна. Хойд урд гэж ялгах бодол тэр жаахан охинд одоогоор үгүй. Эцэг хүний тухай ямархан дурсамжтай өсөх нь гагцxүү танаас л шалтгаална. Сэтгэл тань зөөлөн болохоор сайн аав байж чадна гэдэгт дүү нь итгэнэ. Гэвч энэ амьдрал олон шалгуураар шалгаж байж аз жаргалын үүдийг нээх боломж олгодог шиг. Тэр олон шалгуурыг тэвчээр, ухаан, хүлээцтэй зангаар л давна шүү ах минь.

Хэлэх үг, хийх үйлдэл бүхэн тань тэр жаахан ертөнцөд хайрыг л мэдрүүлэн хүрэх ёстой. Хаа нэг уурлаж хатуухан үг хэлэх үе энэ амьдралд бишгүй л олон тохионо, гэхдээ аашилж загнахаасаа урьтаж ухааруулан сургаж заншвал хүний дээд хүнийг та бүтээж, ачлал хайрыг нь хүртэн насны эцэст жаргана. Сэтгэлийг тань татах бүсгүйгээс урьтаж хажууд нь зогсоо хүүхдийн тухай бодоорой. Өнөөдөр таны нүдэнд жаахан харагдах охин бүхэл бүтэн том ертөнц гэдгийг мартаж үл болно. Гомдож туних, хайрлан баярлах мэдрэмж яг бидэнд мэдрэгддэг шиг түүнд ч бас мэдэгддэг гэхдээ биднээс ялгаатай нь түүний мэдрэмж гэгээхэн. Гэгээн тэр мэдрэмжийн гэрэл сүүдрийг нь та болон гэргий чинь болох бүсгүй л тааруулан тохируулж чадна. Өнөөдрийн үйлдэл бүхэн тань маргаашийн дурсамж болж өөдөхсөн тэр охины ой тойнд үлдэхийг санаж, өрөөлөөс биш өөрөөсөө эхэлж буруу зөрүүг засаж залаарай.

Бидний амьдралд хамгийн ойр тусгалтай нь авга ахын амьдрал. Яг л тань шиг гучаад настай үедээ үрээ дагуулсан бүсгүйг ханиа болгон сонгосон. Сонгосон сонголтондоо эзэн байж, эцэг шиг эцэг, хань шиг хань явсан түүн шиг ачлалт эцэг болж чадна гэж итгэвэл эргэлтгүй та минь хүслээ дага. Эцэг шиг эцэг, хань шиг хань байхад олон зүйл танаас хамааран, таны ухаан, таны ураар эвлэгдэхийг санаарай. Харин өөртөө үл итгэвэл яаран амьдрал зохих гэж хүсэх нь зүйд үл нийцнэ. Бүсгүй охин хоёр таныг дагасандаа харамсан суувал юу нь сайхан байх вэ. Нэг алдсан бүсгүй хоёр алдъя гэж явахгүй нь лавтай, амьдралд нь түшиг, хань болох нэгэн гэж итгэхдээ үрээ дагуулан таныг л бараадан яваа. Ээж шиг уяхан, над шиг эмзэг, эгч шиг гэнэхэн ялгагдах ялгаа нэгээхэн ч үгүй бид яг л нэгэн үрээр ургасан бүсгүй цэцгэс. Бид танаас бие холдож амьдрахад тэр таны гараар дээш өндийн ургаж, таны л дэргэд өнгөө засан үүрд амьдрах болно. Сэтгэлийг нь хайраараа усалж, халамжаараа биеийг нь тордвол тэр энэ хорвоогийн сайхан цэцэгсийн нэгэн болно.

Их зүрх гарган илүү үгийг ахдаа хэлсэнд уучлаарай, танд итгэдэггүйдээ бус энэ амьдалын эрээн бараанд сэтгэл эмртэхийн учир энэ бүхнийг нуршин нуршин тандаа бичсэн юм шүү. Амьдрал гэж юу ч болохыг ойлгохгүй хөөргөн сэтгэлээр хэн нэгнийг сонгочихоод  зугаа төдийхөн санаж, нүүр буруулах залуус чамгүй олон болохоор тэдний нэгэн болж, бүсгүй заяаг гомдоох вий гэж сэтгэл түүртэхийн үнэнийг танаас нууж үл чадна.

Цэцэрлэгийн танхимд нуугдаж тоглоод, хувцасны шүүгээнд эвлэгхэн багтдаг байсан хүүхэд насандаа ч та бид хоёр алхам ч холдоогүй. Сургуулийн сурагч бодчихоод тантай л хамт явахсан гэж яарахдаа цүнхээ мартаж хичнээн ч удаа буцаж гэрийн зүг хурд мэдэн гүйлээ. Намайг шоолох ч хүлээж л зогсох ах минь олон жил надад хань, түшиг болж явсан харин одоо та минь өөр нэгний амьдралын хань, түшиг болох цаг болжээ, яг л тэр үед намайг хүлээж зогссон шигээ тэднийг ч бас хүлээж, зөв амьдралд гурвуулаа хүрнэ гэдэгт тань дүү нь итгэнэ.

Ахдаа болон ах шигээ шинэхэн амьдралыг эхлүүлэх гэж буй мянга мянган залууст аз жаргалын дээдийг хүсье!!!