Тэнгэр заяат Монгол бүсгүй

Сэтгэлд минь цэгцтэйхэн засагдсан хүндэтгэлийн суудалд эрхэм таныг тухлан суухыг хүсье. Хүндэтгэлийн суудал тоо хязгааргүй бөгөөд ягаахан блогын зочин бүхэнд бас удахгүй зочлон ирэх таньдаг бас эс таних хүн бүхэнд зориулагдан миний сэтгэлийн хүндэтгэл хэмээх их танхимд засагдалаа. Хязгаар нь үл мэдэгдэх олон суудалтай сэтгэлийн их танхимдаа та бүхнийг хүндэтгэн урихын учир нь бодол оюундаа их амьдралыг зураглан, ээдрээ учгийг нь та бүхэнтэйгээ тайлсаар хоёр жилийг үдэж, талархлын өдөртэйгээ золгосных юм.

Блог хэмээх энгүй гайхамшигт ертөнцөд та бүхэнтэйгээ эвсэг нөхөрлөн, сэтгэлээс тань урссан дурсамж, бодлоос тань цацарсан үг бүрээс өөрт хэрэгтэйг шимтэн сонсож та бүхний урмын үгээр урдаас тосон ирэх шинэхэн өдрүүдийг баяр баясалтай гэгээхэн угтаж ирсэний учир энэ өдрийг би талархлын өдөр хэмээж хуанлийн хуудаснаа баярын өдөр болгон тэмдэглэж, нууцxан бас догдолж хүлээх болсон.

Хүний нутагт өнгөрүүлсэн хөнгөн гунигтай өдрүүдэд сэтгэлд минь хань болсон та бүхний үгс эмзэгхэн сэтгэлийг хатуу биш зөөлхөн үгээр хурцалдаг болохыг ойлгуулсан. Урсаад л өнгөрөх амьдралын үйл бүхэн ижилхэн байдгийг гагцхүү ав адилхан тохиох үйл бүхнийг сэтгэлийн эзэн болсон хүн би хэрхэн давахаас тосон ирэх хувь заяа өөрчлөгдөн, өөр өөрийн замаар алхдаг болохыг мөн л би та бүхний дурсамж, ухаарлын их бодлоос олж мэдэрсэн учир та бүхэндээ талархан энэ л өдөр амжиж баярлалаа гэж хэлэхийг хүсдэг юм.

Олон сайхан сэтгэлийн хаалга өмнө нь дэлгээтэй болохоор блог хэмээх дотнохон ертөнцдөө яаран яарсаар би ирдэг ч харин гарахдаа хорогдон хорогдсоор арай ядан салдаг энэ зан минь өнгөрч одсон энэ хоёр жилд өөрчлөгдөн хувьссан нь үгүй. Дотно дулаахан, найрсаг сайхан бүхнээс сэтгэлд хэрэгтэй гоёл бүхнийг олдог болохоор энд л би цаг нарыг ч үл тоон саатах дуртай. Та бүхний сэтгэлийн баяр баясгалан, гуниг ганцаардал бүхэнтэй ойр байсан жилүүдэд хүнийг хайрлах сэтгэл минь бүр илүүтэй нэмэгдсэн. Бардам ихэмсэг, дорой унжуу ч бай тэр эзэн биеийн дотоод сэтгэлд үй түмэн бодол гялалзаж бас гуниг ганцаардал нуугдан байдгийг мэдэх болсон учир хатуурхан харцаараа шилбүүрдэхгүй, зөөлхөн инээмсэглэж л харахыг хүсэх болсон. Хүнийг хайрлах зөв сэтгэл, уужим бодол хайрласан та бүхэндээ баярлалаа.

Тайлж үл чадах нууц ихтэй энэ амьдралын гоёл болсон хүн бид бие биеэ бас байгаль дэлхийгээ хайрлан эргэх амьдралын хүрдэн дээр зөвөөр амьдрах нь чухал ажээ. Энэ бүхнийг та бүгдээс ухааран таньсан учир хайрыг би сэтгэлээсээ нисгэн энэ дэлхийн өнцөг булан бүрт суугаа блогчид болон уншигчид та бүхэндээ талархлын хамт илгээж дараах дуугаар мэндчилгээ дэвшүүлж буйг минь хүлээн авна уу.

Алс холоос аялгуу сайхан дуугаар мэндчилгээ дэвшүүлэх боломж олгосон блогчин Бондгор-тоо мөн сэтгэлийн үсгийг минь амь оруулан уянгалаг хоолойгоороо та бүхний сонорт хүргэсэн богино долгионы Р3 -100.9 радиогын хөтлөгч Ари-даа болон блогт минь эгшиглэж та бүхний бодлыг хөглөн, сэтгэлийн тань зөөллөн байдаг уянгалаг аяс болоод энэхүү мэндчилгээг блогтоо байрлуулахад минь тусалсан блогчин Саарал ахдаа маш их баярлалаа. Завгүй их ажлынхаа хажуугаар зав гарган залхуу бас тэнэг дүүдээ туслаж байдаг тандаа маш их баярлалаа.