Тэнгэр заяат Монгол бүсгүй

Хайр дурлалын хос зүүсгэл зүрхэндээ урлаж, гайхамшигт тэр зүүлтээр зүрхээ гоёсон залуус хамтран амьдрахаар сэтгэл шулуудан хуримын тов хэлэлцэх тэр агшин энэ амьдралын эвхэгдэн үлдэх дурсамжийн дэвтэрт хүндтэй хуудас эзэлдэг нь мэдээж.

Хос залуусын хуримын зар сонороос сонорт хүрэхдээ баяр баясгалан бас цагаахан атаархлыг гоонь нэгний сэтгэлд хуралдуулан хүрсээр товт өдрийг тэсэн ядан хүлээгсэд өдрөөс өдөрт нэмэгдэнэ.

Харь нутагт амьдрах уртхан юм шиг энэ хугацаанд хурим найрт уригдаж, сүйн явдлыг сэтгэл догдлон харахыг хүсэв ч тэр бүр хүсчлэн биелэх нь үгүй. Тэгээд ч над шиг найз нөхөд багатай хүнд хурим найрт уригдана гэдэг сарнаас олс уяад савлуур тоглох хүсэлтэй минь адил холын мөрөөдөл санагддаг байлаа. Гэсэн ч би мөрөөдлөө биелүүлэх гэж битүүхэн хурим найр харуулдсаар багагүй хугацааг өнгөрүүлсэн юм.

Нууцxан хүсэх хүслийг минь мэдсэн мэт хамт ажилладаг Энэтхэг, Малайзын эрлийз бүсгүй хурим хийх баярт мэдээгээ дуулгаснаар сэтгэл догдлон найран даа бэлтгээд өнгөрсөн өдрүүдэд завгүй гүйлээ.

Ойрын он жилүүдэд хурим найранд уригдаагүйг хэлэх үү, сэтгэл гэдэг дарцаглан дэвээд хэдэн өдөр өмсөх хувцас, зүүх зүүсгэл л толгойд эргэлдсээр хуримын өглөө төрөл арилжиж дүрээ сольчихоод, цог жавхлантайгаар найрыг зүглэв.

Дунд зэрэглэлийн Энэтхэг рестораны жижиг хаалган дээр хуримлагч бүсгүй болох Бүжигчин ( би түүнийг ингэж нэрлэдэг юм ) ажлын хоёр бүсгүйн хамт тамхилан зогссоор биднийг угтаж, хурим болох танхимд хүргэхээр тус рестораны дээд давхрыг зүглэн хамт явлаа. Угтан авах байдал болоод очсон рестораныг харвал миний төсөөлж байсан хурим биш бололтой. Гэсэн ч гоёл зүүсгэл болсон бүсгүйг хараад сэтгэл догдлохгүй байж яахан чадах.

Жижигхэн вип өрөөнд хоёр эгнээ ширээ зассан нь тус бүрдээ арав орчим суудалтай байх нь олон зочид ирэхгүйг гэрчилнэ. Улбар шар өнгийн ширээн дээр цагаан цэнхэр өнгийн хиймэл цэцэгнээс өөр зүйлгүй хоосон байсан нь ширээ дүүрэн амттантай Монгол хуриманд очиж заншсан миний хувьд тун сонин байлаа. Хоосон ширээн дээр хийх зүйлээ олж ядан утсаараа тоглож суугаа захирал үе үе хоржоонтой инээмсэглэх нь энгийн тэр хуриманд энгүй ихээр гоёсон бүсгүйчүүдийг хараад инээдээ барьж ядаж буй мэт.

Өрөөний зүүн хойд буланд буффьет байрлуулсаныг очиж сонирхвол карри, прата зэргээс бүрдсэн Энэтхэг хоолнууд аж. Буффьетын эсрэг талд цагаан бүтээлэгтэй жижигхэн ширээ тавьсан нь хосуудын хуримын гол үйл явдал тэнд болохыг илтгэнэ.

Бүжигчний хувьд хоёр дахь хурим нь бөгөөд харин залуугийн хувьд анхных нь хурим тул сэтгэл догдлох нь илт. Өтгөн хөмсөг дор давхраа болсон зөөлөн харц, том алаг нүдтэй Гарри гэх даруухан залуу Сингапурт ажиллаж, сурахаар Энэтхэгээс ирж улмаар бүсгүйтэй хайр сэтгэлтэй болсноор ийнхүү хурим аа хийж байгаа нь энэ.

Яаруухан ирсэн ахимаг насны халзан толгойтой хуульч тэдний хуримыг баталж, гэрчийн этгээд болох ажлын бүсгүй Эрика, нөхрийн талын гэрч болох Гарригын найз Энэтхэг залуу нар тус тус гарын үзэг зурж, хосууд бөгж өө солилцоод гэрчилгээгээ гардаж авсанаар хурим бараг өндөрлөв.

Бүсгүйн талаас биднийг эс тооцвол ойр дотно гэх нэг ч хүн байсангүй нь бас л цаанаа нарийн учиртай санж. Хосууд хэн хэн нь Энэтхэг гаралтай ч шүтэх шашин нь өөр тул бүсгүйн ээж тэдний гэрлэх хүслийг хүлээн авч чадахгүй учир хосууд ийнхүү нууцxан хурим хийж найз нөхөд болоод хамт олон бидний дунд л тэмдэглэн суугаа нь тэр аж.

Хайр сэтгэлийнхээ төлөө зориг зүрх гарган эхнэр нөхөр болсоныг нь үнэлж бахдууштай санагдавч ээж аавгүй, элгэн садангүй хурим хийж хамгийн баяртай мөч өө төрүүлсэн ээжтэйгээ хамт өнгөрүүлж чадаагүй нь харамсалтай, нэг л тийм хоосон санагдаж байсан юм.

Найр хурим дуу хуур, инээд хөөрөөр цалгиж, идээ будаагаар элбэг байдаг бол харьд үзсэн хамгийн анхны хурим юм юмаар дутмагхан нэг л тийм хоосон байлаа. Магадгүй тэнд бүсгүйн эхлэл болсон эрхэм ээж байсан бол идээгүй ширээтэй, инж гоёлгүй хурим байсан ч бие биеийнхээ сэтгэлийг дүүргэн хөгжөөж, гэрэл гэгээ нь болж чадах байсан биз.

Дураараа дураараа хэдий ч, дурлалаа дурлалаа гээд ижийгээс зөрж, ижийн харцнаас нуугдаж хэн нэгнийх болж би лав чадахгүй.